2007.03.25

Jadymy maluchym na wczasy

Jadymy maluchym na wczasy,

do DDRu, na Zachód.

Klamorów mómy piynć taszy,

na bagażniku, na dachu.


Ze zadku dziecka siedzóm,

baba kole mie, na zicu,

dyć niech sómsiady wiedzóm,

że nas na wczasy styko.


Baba mo nowo kecka,

jo brele ciymne, do szpasu,

niych sie radujóm dziecka,

że mogóm jechać na wczasy.


Sto marek we potmanyju,

niy trzeba nóm przeca wiyncy,

bo mómy termos tyju

i tasza biksów z miynsym.


Kupiymy se czekulady,

jak styknie, to po lodzie,

niych wiedzóm tyż sómsiady,

że nóm sie fest powodzi.


A jak nazod wrócymy

ze wczasów, za dwa tydnie,

szporować zaś bydymy

i żyć cały rok biydnie.


Za rok zaś przidzie lato,

to biksów se kupiymy,

na Wyngry, nad Balatón,

maluchym pojadymy.


Jadymy se na wczasy,

maluchym, z całóm rodzinóm,

klamorów mómy piynć taszy

i dwa kanistry z bynzinóm.


Fojerman