|
|
|
|
2006.10.06
Stoji pod grubóm
Przeróbka wiersza J.Tuwima "Lokomotywa"
Stoji pod grubóm kolejka tirów,
Kożdy by wóngel wartko nabiyroł.
I niyma dziwa.
Stojóm, czekajóm już tak dwa tydnie,
To nie dziwota, że im sie brzidnie:
Zaś ktoś przeklino,
Kurzić co niy mo,
Tóż nie wytrzimoł...
Stojóm, czekajóm, w autach tam śpióm,
Gorzołeczka walóm, abo w karty rżnóm,
Myjóm sie zeltrym, lotajóm we krzoki,
Jedzóm w szoferce i śpióm tyż, boroki.
Piyrszy przijechoł po wóngel z Łodzi,
Drugi mi pado: z Ełku pochodzi.
Trzeci w Olsztynie miyszko na co dziyń;
I weź sie chłopie - pado mi - ożyń,
Jak dycko w trasie, bez tydziyń, świynta,
Tóż bez to trza sie wyrwać paniynka,
Pełno ich krynci sie pod tóm grubóm,
Jak przidóm chynci, to w krzoki pudóm.
Inny przijechoł kajś spod Warszawy,
Tyn nie narzeko, w dóma je prawie,
Mógli go posłać zaś do Bułgarie,
Tóż woli postoć tu, o bónkawie.
Czworty spod Gdynie, na wóngel czeko,
Statkym popłynie we świat, daleko.
Zamiast cugami wozić tyn wóngel,
Wolóm drógami, bo mómy dobre.
Naroz - szum!
Słychać - bum!
Larmo fest!
Wóngel jest!
Najprzód - pomału - jak żółw - ociynżale,
Ruszyła - ta raja - a za chwila - walóm.
I cisnóm sie, trómbióm, na siła wciskajóm,
Że to byli kómple już zapóminajóm.
I cisnóm sie, cisnóm, kto warci, kto piyrszy,
Aż opóny piszczóm, aże motór wyrczy.
A kaj to? A kaj to? A kaj to? Na woga.
A po co? A po co? Po wóngel, po muł.
Tyn tego blokuje i zajyżdżo dróga,
A tamtyn sie wcisko, choć na kóńcu bół.
Kożdy chce być bliży, jechać na poczóntek,
Nie chce stoć tu wiyncy, bo przeca je pióntek,
Kto dzisio niy zdónży, stanie do pyndziałku
I zaś bez niedziela bydzie społ tu z autym.
Tóż walóm do przodku, jak ci w tej formule,
Żwir leci ze spodku i ogyń we rule.
A po co sie cisnóm, a po co tyn szum?
Po wóngel, po wóngel, po wóngel a muł!
Fojerman
|
|
.png)