2008.06.03

Niż wyruszysz w wielki świat

Ty, co rajzujesz po szyrokim świecie,

Żeby tam szukać piyknych strón,

Pamiyntej: Tyś je Ślónzok przecież,

A sam mosz swój ojcowski dóm.



Nie styknie poznać wielki świat,

Zwiydzić Atyny, Paryż, Moskwa.

Po co daleko zaroz gnać?

Piyrsze trza świat za miedzkóm poznać.



Tam, za tóm rzyczkóm, drugo wieś,

Poznać sómsiada, co za jedyn,

Już tela lot sam miyszkoł żeś,

A nic o wiosce swojij nie wiysz.



Nie wiysz, kto miyszkoł sam przed Tobóm,

Jaki go spotkoł kedyś los.

Ty żeś na Ślónsku sie wychowoł,

A czy Ty jynzyk ślónski znosz?



Nie ważne wiela kto rajzuje,

Wiela w paszporcie wizów mo,

Jak sie Ślónzokym kery czuje,

Tradycje ojców dobrze zno.



Tóż, niż we świat daleki ruszysz,

i zrobisz autym setki mil,

To piyrsze, ziymi swojij, musisz

Poświyncić chocioż pora chwil.


Fojerman