2009.04.02

Mały syneczek

Mały syneczek na Ślónsku miyszko,

ojcowie robióm dló niego wszystko,

nic nie brakuje synkowi wcale:

ptosigo mlyczka, a kakauszale.

Wszyndzi ze synkiym za rynka pudóm:

rano do szkoły, a nazod dudóm.

Dbajóm ó niego, jak o jajeczko,

bo to je przeca kochane dziecko.

Je w historyji tyż jedne "ale":

ón po naszymu nie umi wcale.

Nie chcóm narażać na pośmiywisko,

tóż z nim po polsku godajóm czysto.

Tak sam zaniko tradycjo staro,

jak sie z dzieciami w dóma godało.

Potym sie dziwióm, że Ślónsk umiyro.

Możno zrozumióm. Kedyś dopiyro...

Fojerman