2004.01.15

Maruda

W Rybniku miyszkóm od urodzynio,

żyli tu już moji przodkowie,

talynt móm wielki do marudzynio,

dyć ponarzykóm sobie:


Piyniyndzy na nic niy móm,

na flaszka, ani na mlyko,

najgorszy jest mi zimóm,

na wóngel mie niy styko.


Maluch starszy ody mie,

co chwila coś sie zrypie,

niyma to chyba dziwne,

że cołki czas sie sypie.


A jak ón już odpoli,

trza jeździć po tych róndach,

niy ciyrpia tych zakoli,

chyba se piechty póńda.


Sypióm teraz tyj soli,

szczewiki mi sie rozlecóm,

już niy móm prawie zoli.

Czy óni o tym niy wiedzóm?


Szpital nóm zbudowali,

Syryny po nocach wyjóm.

Jak óni to planowali?

Przeca tu ludzie żyjóm.


Opłaty te wszystki:

za prónd i za śmieci,

trza chyba wziónś pożyczki,

oddować bydóm dzieci.


Ale doś marudzynio,

bo czas tak wartko leci,

od tego tu siedzynio

niy bydzie wiyncy miedzi.


Czas chycić sie roboty,

coś porzóndnego zrobić,

oblyc stare galoty

i na internet zarobić.

Fojerman