2007.07.20

Pióntek - wyjóntek

Jedyn przaje fest sobocie,

zaglóndo do kalyndorza,

bo je wtedy po robocie,

tóż zaś by sie w szynku ożar.



Inkszy czeko na niedziela,

na zolyty przidzie czas,

na muzyka weźnie frela,

czy na szpacyr, kajś bez las.



Zy mie taki je wyjóntek,

cołki tydziyń struty łaża,

czekóm, aż zaś bydzie pióntek

i wodziónka se uwarza.



Jak je kery po imprezie,

tóż narzyko na pyndziałki,

ledwa rano z łóżka zlezie,

robić musi tydziyń całki.



Keryś czeko zaś na strzody,

bo mo do sia pora chwil,

baba wyśle kajś na lody

i oglóndo fuzbal - szpil.



Jo nie myśla o weekyndzie,

jo sie dycko fest raduja,

jak zaś tydziyń cołki przyndzie

i wodziónki smak poczuja.


Fojerman