2007.08.24

Historia o losie złym

Kajś, wśród grubskich kóminów,

historyjo toczy sie ta,

chłopa óna wspómino,

co za przociela mo psa.

Roboty downo niymo,

kanały służóm za dóm,

piosynka ta przipómino,

los bezdómnego nóm.


Ref. Pieśń o zbiyraczu złómu,

co kupić wino chce,

ón niymo downo kómu

zaśpiywać pieśni tej.


Kedyś inaczyj było,

teraz samotny jest,

życi ich połónczyło-

bezdómny człowiek i pies.

Niedola ich złónczyła,

niy majóm tu z czego żyć,

gruba kopać skóńczyła,

chłop zaczón w kóńcu pić.


Ref. Pieść o losie człowieka

o jednym spośród nas.

Co w życiu kogo czeko,

co nóm prziniesie czas?


Jak widzisz bezdómnego,

co zbiyro w hasioku złóm,

westchnij na dola jego

i raduj sie, że mosz dóm.

Nie kożdy to je złodziyj,

bezdómny tyż hónor mo,

krómkóm chleba sie podziel,

żeby se tyż co zjod.


Ref. Pieśń o drugim człowieku,

co żyje ze swoim psym.

Czas już kóńczyć po leku,

historyjo o losie złym...


Fojerman