|
|
|
2007.09.02
Jak bych umioł
Jak bych umioł zdobyć skrzidła od skowrónka,
polecioł bych zaroz dookoła Ślónska,
śpiywoł bych kożdymu, kogo yno spotkóm,
pozdrowioł bych ludzi staróm, ślónskóm, godkóm.
Wzión bych na ta rajza kożde małe dziecko,
i o Ojcowiźnie opowiedzioł wszystko:
kim byli powstańce, a kim partyzanty,
kto to był Morcinek, a kery Korfanty.
Lecioł bych nad Rybnik, Chorzów i Piekary,
pokozoł bych Bytóm i Racibórz stary,
lecioł bych nad gruby i nad familoki,
z wiyrchu bych pokozoł, jak żyjóm Ślónzoki.
Jak bych nad hołdami tam wysoko lecioł,
to bych opowiadoł o Cia naszym dziecióm,
o powstańcach ślónskich, z Wujka o tragedii,
co w godzinie próby, za wolność, polegli.
Tak bych chcioł polecieć i im porozprawiać,
o ślónskij tradycji, co z dziada pradziada
była przenoszóno we ślónskij familii,
a na naszych oczach umiyro w tej chwili.
Czy by to, co wieki całe tu przetwało,
teraz, w naszych czasach, tak skóńczyć sie miało?
Chcioł bych tak polecieć, ale dyć niy moga,
tóż tak kómbinuja i trocha mi szkoda...
Fojerman
|
|
.png)