2008.09.13

Szczynść Boże

Szczynść Boże, Mój Ślónsku. Do Ciebie sie zwracóm,

Starym pozdrwiyniym naszych Ojców, Matek,

Chca Ci podziynkować, Ziynio Nasza, za to,

Że mómy sam chleba kożdy dziyń dostatek.



Szczynść Boże, Mój Ślónsku. Za wszystko to, co Ty

Nóm przinosisz, swojim wiernym dzieckóm,

Za te skarby w ziymi, za miejsca roboty,

Górników pod ziymióm miyj w opiece dycko.



Szczynść Boże, Mój Ślónsku. Za pola i lasy,

Za te krajobrazy, kolorowe kwiotka,

Za tysiónc lot długich historyje naszej,

Za cało kultura i za ślónsko godka.



Szczynść Boże, Mój Ślónsku. Teraz Cie przepraszóm,

Za wszystki zgorszynia z naszej rynki, krziwdy,

Nie poczytej tego dzieckóm swojim nigdy,

Bo, Tyś je, Ślónsku, Ojcowiznóm Naszóm.



Szczynść Boże, Mój Ślónsku. Czuja sie w potrzebie,

Za te wszystki dobra dzisiej podziynkować.

Jakich słów móm użyć, co powiedzieć, nie wiym,

Przichodzóm do głowy yno te dwa słowa:



Bóg zapłać.

Fojerman