Sztrajk

Kajś na placu, kole wrotōw,

Zebrało sie roz sto kotōw.

Jedyn miauczy, drugi mruczy,

Trzeci pukel stawio, fuczy.

A skōnd ôroz sie tam wziyny

Z cołkij wioski wszystki kotki?

Możno tego sie dowiymy

Z tej miaukliwej kocij godki?
Koty prziszły na narada,

Jako majōm przetrwać zima.

- Już je poła listopada,

A dlo kotōw placu niy ma

We pywnicy żodnej we wsi.

- To sie niy chce w głowie smieścić!

- Kury siedzōm we kurniku,

Gusiok se śpi we chlywiku

I mo pełno we korycie,

Yno koty, uwierzicie,

Ône muszōm spać na dworze.

- Tak być dłōżyj sam niy może!

- Trza ôgłosić koci sztrajk.

- Niech se myszy locōm fraj.

Uradziyli, ugodali,

Doczkajōm, co bydzie dalij.

Ôroz kożdy we wsi słyszy:

- Skōnd sie wziyno tela myszy?

- Kaj sōm koty?

- Do roboty!

A po kotach ani śladu.

Aże keryś głośno padoł,

Co bezmała majōm sztrajk.

- Co je? Kaj?

- Majōm fraj.

- Kej chcecie we zgodzie żyć,

Musi sam porzōndek być.

- W kożdej chałpie już ôd dzisiej

Ôkynko nōm ôtworzicie

Ze pywnice.

- I powiycie waszym psōm,

Że niy majōm szczekać nōm,

Jak locymy kaj po placu,

Bo nōm yno myszy straszōm!

Ludzie radzi, czy niy radzi,

Człowiek przeca niy poradzi

Myszy chycić,

Taki życi,

Musieli powpuszczać potym

Do ôkynek wszystki koty.

Dyć już sie bezmała słyszy,

Co sztrajkować bydōm myszy.

Fojerman