2020.07.23

https://soundcloud.com/stanislaw-neblik/lato-a-zima

Lato a zima

Chciało sie lato ciupnyć ze zimōm,

Bo chciało trocha chłōdka a ciynia.

- Jo tam ze hycym starości niy mōm,

Rada sie z tobōm placami zmiynia.

Dyć prziszoł grudziyń, a śniega niy ma,

Bo niy mo lato ô tym pojyncio,

A na Hawajach grzeje sie zima,

Rada, że w kościach już jōm niy krynci.

Gody pomału mōmy na karku,

A kożdy czako na bioły śnieżyk,

Tōż napisali do zimy wartko.

Ta pismo czyto, ôczōm niy wierzi...

Gody bez śniega? Niy może być!
Kozała latu mrozym podmuchać.

Wszystko zamarzło, zaczło sie szklić.

Jedna kełzaczka. Lato, pierucha,

Ukełzło zaroz, rynka złōmało,

Wylōndowało we lazarecie,

I cołki lato tam przeleżało.

A Wy sam, ludzie, lato mieć chcecie.

Przeca go zima zastōmpić musi,

A strach mo puścić kokotek z hycym,

Chocioż roz za czas trocha jōm kusi,

Pomiyszać lato a zima z wicym.

Fojerman