2007.10.31

Kedyś, a teraz

Kedyś sie chowało

kozy we chlywikach,

teraz trzimióm w dóma

szczura i chómika.



Kedyś psy szczekały

normalnie, przi budzie,

a teraz miyszkajóm

we blokach, jak ludzie.



Kedyś my chodziyli

piechty do kościoła,

teraz sóm parkingi

pełne i przi szkołach.



Kedyś sie za balym

lotało na dworze,

teraz sie gro fuzbal

myszkóm w mónitorze.



Kedyś przed laubami

sómsiadki klachały,

teraz gadu-gadu

i czaty nastały.



Kedyś sie w niedziela

siedziało do kupy,

teraz niyma czasu -

trza iś na zakupy.



Kedyś sie zygarek

w kómónio dostalo,

a teraz kómputer

już, bezmała, mało.



Kedyś, tak godajóm,

było sam tak piyknie,

a teraz, se myśla,

pisanio już styknie.


Fojerman