2009.06.15

Filmik

Razu pewnego, chyba w niedziela,

tak kole drugij, już po obiedzie,

piykno pogoda, czasu za tela,

nie chciało mi sie w chałupie siedzieć.

Tóż ciymne brele, czopka na glaca,

bez siyń, a lauba przemykóm cicho,

kej je okazjo, wartko sie traca.

Choć staro drzymie, to nie śpi licho.

Za chwila leci w telewizorze

film o Bercikach, o "Świyntej wojnie"

i mi go baba ogłóndać koże,

a jo sie wola stracić spokojnie.

Wpadóm do szopy, dźwiyrze otwiyróm,

jak w nosie czuja bynziny smak,

to jo sie wtedy czuja dopiyro,

że sie przedy mnóm otwiyro świat.

Stary motorek mo kółka trzi,

a wiela on mi dowo uciechy,

jak robia rundka bez poła wsi

i moga prziciś mu gaz do dechy.

Ludzie mi kiwióm, auta mrugajóm,

sie oglóndajóm, a robióm zdjyncia,

widać uciecha z tego tyż majóm,

a jo se dali przed siebie pyndza.

Oroz coś mrugo na mie z daleka,

wyskoczył jakiś bioły z lizokiym,

a z zadku za mnóm wideotyka.

Nie byda godoł co było potym.

Chłop mie zaprosiył sóm do pojszodka,

padoł, że filmik mi tam pokoże,

i nawet zrobiył mi fajno fotka.

Jo osiymdziesiónt mioł na zygorze.

Filmik piynć punktów dostoł ocyna,

w dóma czekała mie wojna "świynto",

do tego "dwiesta" chciol jeszcze, świnia.

Długo tyn seans byda pamiyntoł.

Od tego czasu je żech spokojny,

oglóndóm z babóm w telewizorze:

"Klany", "Dynastie", a "Świynte Wojny",

choć słónko świyci fajnie na dworze.

Nie sóm mi zocne już te wybryki,

wola przi babie w dóma zostać

poloć ta woda, pisać wierszyki,

choć sam po uszach tyż idzie dostać.

Fojerman