Z uśmiychym, abo z płaczym

Piyrwej niy wiedzioł żech, uwierzcie,
Co Jynzyk Ślōnski mo za moc,
Aż godać zaczōn żech, nareszcie,
A w sercu coś sie zaczło dzioć.

Dyć myśloł żech, że to je śnik,
Bo to je przeca niy do wiary,
Że nasze szare, proste dni,
Jynzyk tak miyni, choćby czary.

Dyć dzisiej dobrze ô tym wiym,
Wiela tyn jynzyk znaczy,
Tōż dycko godoł byda nim,
Z uśmiychym, abo z płaczym.