Wiela woży piniōndz

Tak se myśla, wiela to tyn piniōndz na świecie je wert, wiela woży? Ô naszym niy byda za wiela godoł, bo chocioż padajōm, że ôn je złoty, to mie sie zdo, że ôn je yno taki ôwinyty we pozłōtka. Dycko padali, że tyn nimiecki to je dużo wert, ale jak se wziyni tych przocieli ze wschodu, to zaroz straciōł marka. Tōż możno japōński? Dyć ôn je jakiś taki jyny, jyny. Papuas posłoł mie do kina, a Koreańczyk padoł mi – wōn! A te Turki, słyszeliście ô tym, to sōm same muzykanty, na lirach grajōm. We Rōmōniji sie piniōndzami leje. Za to dejcie se pozōr na Bułgarōw, bo ôni majōm te piniōndze jakiś lewe. Czechy, ci to majōm piniōndze dużo wert, bo majōm same korōny, ale niy majōm głōw do tego. Te ruski, to taki ru… ble, ble. Jo wōm radza dać se pozōr na Anglikōw, jejich piniōndze to wożōm aże fōnt. Dyć Amerykōnōw żodyn niy przebije. Ôni to we briftaszy pora cyntōw noszōm. Bezto powymyślali te roztomańte karty, kōnta, a inksze cuda, żeby tela niy dźwigać.