Śpiywki ślōnski

Wczora byli my

30 stycznia, 2007 /

Wczora byli my dzieciami,
Dzisio wnuki sōm,
Wczora boso my lotali,
Dzisio pod krykōm.
Tak tyn czas nōm wartko leci,
Wielki sōm zaś nasze dzieci,
Wnukōw pełny dōm.

Przeszło lato, prziszła zima,
Już zaś minōł rok,
Żeby tak kalyndorz wstrzimać
Chocioż trocha szło.
Tak sie krynci świat dokoła:
Nupel, wōzek, potym szkoła
I już siwy włos.

Życi piykne w kożdym wieku,
Może przeca być,
Po bosoku, czy pod krykōm,
Piwo idzie pić.
Tōż uśmiychnij sie przocielu,
I przed siebie idź do celu,
Szczynści w rynce chyć.