W szynku po wypłacie

W szynku po wypłacie
spotkali sie sōmsiedzi.
Przi piwku i przi szkacie
tak fajnie sie im siedzi.

Tu spōminajōm stare dzieje,
stare pieśniczki śpiywajōm,
szynkosz piwo im leje,
jak prōzne kufle majōm.

W szynku po wypłacie
sōm fajne te imprezy,
jedyn tam przegro gacie,
inkszy pod stołym leży.

W szynku po wypłacie
je fajnie i wesoło,
ale dej pozōr kamracie,
byś niy szoł dudōm goło.