Urodziny ôd pingwina

W Afryce miyszko żyrafa. Spytejcie sie geografa,
ôn wōm na pewno pōmoże, Afryka na mapie pokoże.
Jo mapōm niy rozumia, tōż pōmōc wōm niy umia.
Żyrafa se tak siedzi, pingwina chce nawiydzić,
chce jechać w ôdwiedziny, bo pingwin mo urodziny.
„Niy bydzie to leko sprawa, bo to daleko wyprawa,
ale pojechać tam musza i w rajza na pewno wyrusza,
pojada kole wtorku, bo jeszcze niy mōm paszportu”.
Tōż idzie nasza żyrafa po zdjynci do fotografa,
a tyn ji godo: -Żyrafo, jo niy mōm klisze na to,
ty żeś je tako dłōgo, że to sie na pewno niy udo.
-To możno jo sie schyba, bych trocha myńszo była,
prosza cie tak fest piyknie, możno to jako styknie.
-Jo wezna te zlecyni, na twoji specjalne życzyni,
żebyś te zdjyncie zaniōsła i paszport mōgła dostać.
-Pingwin w Arktyce żyje, tam dycko wiater wieje,
szala na karku niy mōm, tōż jako pojada zimōm?
-Zrobia ci szal na drōtach – zgodziōł sie ôrangutan –
jo ci tyn szalik zrobia, ale, czy jo sie wyrobia?
Do wtorku je mało czasu, a wełny niy mōm zapasu.
Wtym łeb wychylo zza płota zaspany hipopotam:
-Strzewiki pożyczać ci moga, bo mōm za wielko noga,
ciebie sie przidać mogōm, przed takōm dalekōm drōgom.
Lew z pyskym swojim ryczy: -Moga ci grzebiyń pożyczyć,
jak grziwa se uszykujesz, to pingwin sie uraduje.
A z wody żegocōm żabki: -My ci zrobiymy kanapki,
żebyś w drōdze pojadła i z głodu nōm niy padła.
A zza strōma wōnż zaś syczy: -Moga tasza ci pożyczyć,
podarki tam zapakujesz i pingwina ôbdarujesz,
ôwocōw sam dużo mōmy, niech wiy, że pamiyntōmy,
u niego je teraz zima, tōż ôwocōw żodnych niy ma.
Małpice tyż pōmogajōm, banany ze strōmōw sruwajōm
i nawet tygrysek młody, do termosa prziniōs wody.
I tak wielcy, strzedni, mali, wszyjscy żyrafire pōmogali.
żeby mōgła nawiydzić pingwina i zawiyź mu życzynia.

Jak ci sie wydować może, że nic ci już niy pōmoże,
że twōj plan je fest szalōny, podziwej sie z drugij strōny:
najgorszy je piyrszy krok, niż ci zdōnży pōmōc kto.
Yno ruszyć trzeba głowōm, potym inksi ci pōmogōm.
Jak coś robisz fest wytrwale, możesz zrobić dziura w skale.
Jak ktoś pokōno swoji nawyki, to i żyrafa pośle do Arktyki.