To poradzi kożdy gupi

Skosztowoł bych żuru, we piōntek na ôbiod,
Dyć już żech sam w mieście wszyjski kaczmy ôbloz,
Majōm sam kebaby, pizzy a hot-dogi,
Ale żeby żuru? Ôchrōń, Boże Drogi!

To poradzi kożdy gupi, u Chińczyka ryżu kupić,
Dyć to je dziepiyro sztuka, na Ślōnsku wodziōnki szukać.

Chcioł bych z kartoflami zjeś se trocha kiszki,
Dyć żech z plynskyrzami przeszoł sklepy wszyski,
Było coś we strzewie, mianowali kiszkōm.
Ôstoł żech ô chlebie, a ô suchym pysku.

To poradzi kożdy gupi, u Chińczyka ryżu kupić,
Dyć to je dziepiyro sztuka, na Ślōnsku wodziōnki szukać.

Chcioł żech se na Ślōnsku pokosztować żuru,
Prziniōśli w talyrzu, podali z kulturōm,
Skosztowoł żech łyżka, a ôdstawiōł na bok.
Tyś mi dała żurek, a niy żuru, babo.

To poradzi kożdy gupi, u Chińczyka ryżu kupić,
Dyć to je dziepiyro sztuka, na Ślōnsku wodziōnki szukać.

Prziszoł żech se dudōm, nawarzōł brōutzupy,
Chlyb, czosnek a tłōste, pofyrloł do kupy,
A jak zawōniało, poczuł żech sie u sia.
Dyć te ślōnski jodło sōm se warzić musza.

To poradzi kożdy gupi, u Chińczyka ryżu kupić,
Dyć to je dziepiyro sztuka, na Ślōnsku wodziōnki szukać.

Tak se myśla, Ślōnsku, co to wszysko znaczy,
Że sie tak pōmału nōm po kōnsku tracisz?
Niy ma już kołoczka, bo majōm drożdzōwki,
A zamias ôplerka, sprzedujōm parōwki.

To poradzi kożdy gupi, u Chińczyka ryżu kupić,
Dyć to je dziepiyro sztuka, na Ślōnsku wodziōnki szukać.