Teleporada

Chcioł żech sie ôtok zapisać na ta teleporada do dochtora. Niy, co bych bōł jaki niymocny, ale chcioł żech wiedzieć, co to je ta teleporada. Telepizza znōm, telegazeta tyż, ale teleporady jeszcze niy. Fōndnōł żech se ekstra nowy mobilniok, coby doochtōr wiedzioł, co mie styko. Tōż zaczōn żech ôd rana zwōnić, coby sie umōwić na ta teleporada. Zaczło sie tak:

-Jesteś 43 w kolejce, czekaj na połączenie z konsultantem…, jesteś 27…, jesteś 12…

Jak żech już bōł 5 w tej raji, to żech sie wartko poczosoł, siod żech se na stołek, a czakōm.

-Jesteś 1 kolejce, czekaj na połączenie z konsultantem.

Tōż czakōm: 5 minut, 10 minut, sztwierć godziny, i cały czas je żech piyrszy. Ôroz:

-Tit…tit… tit – połączenie przerwane.

Tōż zwōnia roz jeszcze i zaś:

-Jesteś 28.., jesteś 15…, jesteś 5…

Tōż jo żech już je cały w nerwach.

-Jesteś 1.

Boja sie, co ze stołka sleca z nerwōw, a tam baba ôdbiyro a mi pado:

-Proszę przyjść jutro na godzinę 10:00 do pana doktora.

Tōż jo żech sie tele nazwōniōł za tōm całōm teleporadōm, coby ôna mi padała, że mōm prziś jutro do dochtora. A dyć jo dalij niy wiym, co to je ta teleporada.