Tedy-owdy

Cicho! Jo pisza!
Myśli niy słysza.
Niy widza liter.
Wypiōł żech liter
Dzisio dopiyro.
Pysk sie ôtwiyro,
Ôczy mi klapiōm.
Dyć bych sie napiōł
Teraz doprowdy,
Bo tedy-owdy
To niy ma grzych.
Scyganiōł bych,
Że pija dziynnie.
Człowiek sie zdrzimnie,
Kej ledwa żyje
I tak przegnije
Całe dwa dni.
Aż mi sie śni,
Żech je kamela,
Co to niywiela
Trza ji do picio.
Dyć szkoda życio.
Wartko sie zbiyrōm.
Teraz dopiyro
Se tak łōnacza,
Że to ôd kaca
Łep mi tak pynko.
Tōż leca pryndko,
Bo tam w pywnicy
Mōm kajś dwie biksy.
Lech, abo Tyski?
Jo przaja wszyjskim.
Wywietrzeć niy dōm.
Jak biksy sprzedōm –
Kupia jabola.
Choć lepsze wola,
Porzōndne marki,
Co mynij siarki
Majōm we sobie –
Ôbala ôbie.
Dyć zaroz potym
Sie do roboty
Biera na fest.
Gupi żeś jest?
Jo do łopaty?
Bōł bych puklaty!
Zdrowio mi szkoda.
Wola loć woda.
Jeszcze niż usna
Powiym wōm yno:
Na trzyźwo już zaś
Mie to tak wziyno.