Szkoła

W pyndziałek stanōł Franek wesoły,
Że dzisiej może zaś iś do szkoły,
Bo ôn już chodzi do piyrszej klasy,
Hefty, a ksiōnżki mo w pukeltaszy.
Dzisiej ślabikorz ze sobōm biere,
Bydzie sie uczōł ślōnskich literek.
Jutro, we wtorek, majōm prziroda,
Pujdōm do lasa, abo nad woda.
Rachōnki majōm w szkole we strzoda,
Uczōm sie dzielić, mnożyć, dodować.
We sztwortek Franek mo gimnastyka,
Nie trza go prosić, że mo ôblykać
Bluza, galotki, trampki wygodne,
Bo dzisiej bydōm grać we dwa ôgnie.
Dyć bōł dopiyro tydnia poczōntek,
A już zaś kōniec, bo już je piōntek,
Z całego tydnia bydzie powtōrka,
Klasōwka zrobi dzieciōm rechtorka.
Jutro, sobota, zaś bydzie fraj,
Bydzie mōg lotać se bele kaj,
Popuszczać drachy, skokać po strōmach.
W niedziela wiyncyj trza siedzieć w dōma,
Zrobić zadani, iś do kościoła.
Potym ôd nowa zaś czeko szkoła…