Studziynka we Jōnkowicach
Chcioł bych Wōm dzisiej ôpowiedzieć tako jedna historyjo i zachyncić Wos do ôdwiydzynio ciekawego miejsca, sam na tyj naszyj, rybnickij ziymi.
Było to downo, ponad piynćset lot tymu (ok 1433 roku), kedy na Ślōnsku byli Husyty, co niy ciyrpieli Pōnbōczka i ludzi, co w Niego wierzyli.
Jedyn ksiōndz z Rybnika jechoł do takij choryj baby na wieś, co była tam, kaj teraz sōm Marklowice. Wtedy niy było jeszcze autōw, ani kołōw, yno jeździyło sie na kōniach wszyndzie. Tyn ksiōndz, co sie mianowoł Walynty, tyż jechoł na kōniu. A wtedy w tych strōnach były wszyndzie yno same lasy.
Jak jechoł tyn ksiōndz Walynty bez tyn las, to dowiedziały sie ô tym te Husyty i zaczły go gōnić, żeby go zabić i zebrać mu tego Pōnbōczka i zniszczyć, bo żech Wōm padoł, że ôni byli na Niego fest ciynci.
Jak sie tyn ksiōndz Walynty kapnōł, że go gōniōm te gizdy, to pognoł tego kōnia, żeby im uciyc. Jak już widzioł, że niy dowo rady uciekać, to wziōn i schowoł ta hostyjo we strōmie, kaj była dziupla ze pszczołami, żeby jōm niy znodli ci niywierni. Ôn sōm zaczōn uciekać dalij, ale coroz barzij go dogōniali, bo kōń mu już zaczōn słabnyć i w kōńcu dopadli go w takij dolinie i zabiyli.
W miejscu tym, kaj zabiyli tego ksiyndza, pokozała sie woda i beztōż nazwali go Studziynka.
W nastympnych wiekach zapōmnieli pōmału ô tym, dopiyro w XIX wieku ksiōndz Bolik, za to, że ôdzyskoł zdrowi po ciynżkij chorobie, wybudowoł we Studziynce kapliczka murowano (poświyncono w 1895 roku). Koło niyj na piynćset lot śmierci ksiyndza Walyntego zbudowali w latach 30 – tych XX wieku grota ze Figurōm Paniynki Maryje.
Słyszoł żech, że bez wojna miyszkoł we Studziynce jakiś pustelnik, ale ô nim niy wiym nic wiyncyj, beztoż Wōm niy ôpowiym.
Po wojnie Studziynka ta została trocha zniszczōno bez te szkody gōrnicze z gruby, zalywała jōm woda, popynkały ściany, ale teraz zaś zostalo to poōdnowiane, kapliczki wybudowali nowe i jest tam fest piyknie.
W miejscu, kaj tyn ksiōnz Walynty schowoł Pōnbōczka do tyj dziuple ludzie zbudowali drzewianny kościōłek (ok 1670 roku) i stoji ôd do dzisiej. Pod ołtarzym w tym kościōłku jest piyń z tego strōma, co mioł ta dziupla, a kościōłek je pod wezwaniym Bożego Ciała.
We Studziynce ôd lot, kożdo drugo niedziela maja przijyżdżo Biskup i ôdprawio Mszo. Sōm tam tyż ôdprawiane Nabożyństwa Fatimski kożdego 13 dnia miesiōnca w letnij porze ôd moja do października. (teraz te daty sie bezmała pōmiyniyły, tōż trza sie ôpytać)
Jakby kery z Wos mioł chynć i czas, to możecie sie kedy wybrać do tyj Studziynki i kościōłka. Idzie tam dojechać autym, na kole, abo jakimś inkszym autobusym.
Kościōłek je ôddalōny ôd Studziynki jaki 2-3 km, to idzie se zrobić fajny szpacyr.
Przi Studziynce idzie posiedzieć w lesie na dece, napić sie świyntej wody, zrobić jakigo grilla. Jo tyż starōm sie tam jeździć czynsto i Wos do tego namowiōm, tych z bliska i tych z dalsza.
Ôpowiedzioł żech Wōm, tak jak żech umioł ô tyj Studziynce i ksiynzu Walyntym, możno kero data, czy inkszy fakt sie niy bydzie zgodzoł, ale ô tym możecie se poczytać w mōndrych ksiōnżkach, a jo chcioł żech Wōm yno pokozać, że tako Studziynka, tu na naszej rybnickij ziymi je, i że werci sie jōm kedyś ôdwiydzić, do czego zachyncōm Wos wszyskich