Starzik na Allegro

Siedzōm tak starzik na ryczce za piecym,
A sie przi tymu festelnie nerwujōm,
Bo bez dziyń cołki ôd rana prōbujōm,
Jako skamracić sie idzie z tym necym?

Wnuczek feryje mo praje dwa tydnie,
Tōż bōł pojechoł do ciepłych kajś krajōw,
A starzik siedzōm i choć sie starajōm,
Rady niy dajōm. Już sie im to brzidnie.

Dyć se padali: „Do kōńca sam siedza,
Bez cołki tydziyń, na krok sie niy rusza.
Jo na Allegro dostać sie tyż musza!
To niy ma przeca tajymno ta wiedza.”

Starka zrobiyli za błozna starzika,
Bo uciekali im dziynnie do szynku.
Dyć sōmsiod pado: – Ty se kup, Erwinku,
Tam na Allegro, na wartko, ta kryka.