Ściepa na Dzieciōntko dlo dziecek we Papui

My już downo zapōmnieli ô Dzieciōntku, hned bydzie Zajōnczek, abo Hazok, ale Dzieciōntko we Papui niy zapōmniało ô dzieckach a naszyj ściepie. Za nasze piniōndze ze ściepy (1250 zł) i dodatkowe 100 zł ôd inkszego mojigo Kamrata poza ściepōm udało sie kupić towor za mynij wiyncyj 1500 Kina. Teraz 75 dziecek dostanie lyki na grzibica i mydło, a 200 dziecek dostanie lyki na chroboki i co słodkigo ku tymu. Niy wiym yno, czy same Dzieciōntko pojedzie z tymi lykami nad rzyka Sepik, a możno pośle Zajōnczka, ale mōmy ôbiecane, co potym dostanymy zaś pora zdjyncōw.

Roz jeszcze dziynkuja ôd sia a ôd Dzieciōntka Wszyjskim tym, kerzi nōm pōmōgli przi tyj ściepie. Trza nōm tyż podziynkować bratu Szymōnowi SVD, kery je pōmagerym ôd Dzieciōntka, a to tam wszyjsko szykuje we Papui.