Prośba

Jo Cie prosza piyknie:
Poczytej – a styknie.
Dyć niy gorsz sie na mie,
A niy godej mamie,
Tatowi – brōń Boże,
Ôn wiedzieć niy może.
Ani rechtorowi,
Bo jak ôn sie dowiy,
Co sam wypisuja,
To dostana dwōja.
Niy godej tyż ōmie,
Bo by było pō mie.
Niy idź z tym do ciotki,
Bo rozniesie plotki,
A rozgodo we wsi,
Tōż mie farorz przechrzci,
Wyczyto z ambōny.
Byda potympiōny.
Coś to zmiyni? Bodej.
Dyć Ty nic niy godej.