Posłoł pies sms

Posłoł roz do kota pies
Bez mobilniok sms,
Że ôn coś we budzie słyszy,
Tōż to bydōm możno myszy
I pies prosi pilnie kota,
Bo dlō niego mo robota.

Dyć kot niy ma przeca gupi,
Pies na bojka go niy kupi,
Przeca niyroz już bywało,
Że sie psowi gupot chciało,
Bo sie chcioł podroźnić z kotym,
A go bez plac gōniōł potym.

Tōż ôdpisoł psowi kot,
Że rod by te myszy zjod,
Ale uwarzōne w zupie,
Tōż kej coś tam psowi klupie,
Niech ich chyci, a w sobota
Na ôbiod zaprosi kota.