Posłōchejcie ludzie

Posłōchejcie ludzie,
Co chcymy Wōm pedzieć:
Poklachać trocha, pośpiywać,
Przi piwku posiedzieć.

My sōm ślōnski chłopy,
Piszymy gupoty,
Co jedyn kōnda napisze,
Drugi śpiywo potym.

Jedyn „Zegrōdka” mo
I dycko ô nia dbo,
Piyknie tam wszysko flancuje.
Utopka kożdy zno.

W czerwiōnyj kapelce
Z kopytkym na nodze.
Niyjedna dziołcha gōniōł już
Utopek przi wodzie.

Drugi leje wodōm,
Przaje ślōnskim słowōm,
Fojerman godkōm bawi sie,
Naszōm, ślōnskōm mowōm.

Niech godka ta kwitnie,
Rozwijio sie piyknie,
Jak chcesz jōm z nami zachwolać,
Pośpiywać se styknie.

Siedzymy na ryczce,
Przi małej pyrtulce,
I fajnie mijo nōm tyn czas
Przi ślōnskij muzyczce.

Wōm tyż zrobiymy plac,
Siodejcie kole nas,
Kto chce sam z nami bawić sie.
Niech wartko dowo znać.

Przelecioł wieczōr już,
Trza sie wybiyrać spać,
Tōż piyknie wszyskich żegnōmy,
Jutro przidymy zaś.