Ôżarty Nowy Rok

Jedyn roz we Silwestra
Trefiyły sie dwa kamrety,
Bezto potym Nowy Rok
Bōł rano ôżraty.

Trocha mu sie w taszy
Kalyndorz rozsypoł,
A było go gańba
Bezto sie niy spytoł,

Jako mo pozbiyrać
Cało ukłodanka?
Nō i teraz mōmy
Tako niyspodzianka:

Na poczōntku stycznia
Je pojstrzodek lata,
Potym bydzie wrzesiyń,
Grziby bydōm w lasach.

A po wrześniu – marzec
I pōł metra śniega.
Tak go wyszykowoł
Stary Rok – kolega.

Mōm do ciebie prośba,
Roku ty nasz Nowy:
Na drugi roz pij toast
Bezalkoholowy.