Ôszkubane pilynta

Zaczły sie nōm kluć dzisio pilynta w kotyku.
Mama już dwa prziniōsła i trzimie w koszyku,
Bo by ich gynś przigniōtła. Bydōm sie tak kluły
Przi piecu, kajś w cieple. Dziecka zaroz wyczuły,
Strupy, że coś sie dzieje. Kożdy już zaglōndo,
A tam yno szupy, a z nich coś tam wyglōndo,
Ruszo sie, a piszczy. Ze dwa dni potrzebujōm,
Aż sie wszyski do kōńca z tych jajec wyklujōm.
Na razie sie zaczły nōmery dwa, a siedym.
Pamiyntōm, jak gynś zaczła niyś te jajka, wtedy
Mama prziniōsła kastla jakoś po strzewikach,
Ołōwkym kopiyrowym zaczła potym pisać
Nōmery na tych jajcach, co by sie niy zmyło.
Niy wiym, na co potrzebne ji to wszysko było,
Te śmiyszne pisani? Aże siedym naniōsła
Gynś tych wielkich jajec. Tata tam posłoł słōmōm,
Zrobiōł gniozdo, a mama wziyna jajca z dōmu.
Teraz sie te pilynta zaczły pomału kluć.
Szupy już zaczły pynkać, tōż gynś to musi czuć
I sztyjc dziubym przebiyro, kulo, a przewraco.
Bezto mama jich zbiyro. Tak se myśla, na co
Nōm te pilynta bydōm? Byda musioł lotać
Zaś na pokrziwy, a tata musi tyż klota
Pozbijać na te liwy, bo trza ich kajs popaś.
A kery ich bydzie musioł dziynnie paś? Jo zaś.
Rano z kotyka wyganiać, do kloty nosić.
Jak se to yno spōmnia, to mie bierōm diosi.
Ja, jak gynsi wyrosnōm, to bydzie uciecha,
Mama ich oszkubie, piyrzi wrazi do miecha.
Potym przidōm sōmsiadki i bydzie szkunani.
Dyć jo tak niyciyrpliwie czekōm dycko na ni.
To ni ma nic dziwnego, bo tak w mojim wieku
Na tako gościna kożde dziecko tyż czeko.
Ni mocie pojyncio, co to je te szkubani,
Bo niy znocie tej godki całej przi szkubaniu.
To je lepsze, niż miodek słodki przi śniodaniu.
Ani niy chcerz lecieć pokełzać na kełzaczce,
Yno byś siod tak blisko przi kerej szkubaczce,
A słōchoł tych bojdōw, te wszyski szprymy zbiyroł.
Tam sie idzie dowiedzieć wszyskigo dopiyro.
Niy mosz ani pojyncio, jak sam rozprowiajōm.
Farorza, dochtora, kożdego obgodajōm.
Kogo zaś z kim widzieli, kero z kerym lygo,
Kogo ktoś, przi niedzieli, w kościele niy widzioł.
Niy trza kōmputera i niy trza internetu,
Baby już za tela uświadōmiły mie tu
Bez tyn tydziyń, choćby osiym klasōw we szkole.
A reszta przidzie od kamratōw przi gorzole,
Jak trocha podrosna. Na razie brakło piyrzo.
To niy sōm błozna – szkubnik sie pomału zbliżo.
Zaś sie bydzie dzioło, juścić bydzie impreza.
Na stole je kołocz, tōż jo za stołym siedza,
Zymby szczyrza, piyrszy, bo już żech sie dowiedzioł,
Co bydzie z tego piyrzo. Keryś sam powiedzioł,
Że pierziny sōm uszyte. Frela je w dōma,
Zacznōm sie hneda zolyty, trza bydzie nōm na
Weseli szporować. Kej kawalery przidōm,
Bydōm freli przować, to pierzina sie przido.