Dzisiej chcioł bych Wōm ôpowiedzieć ô tym, jak jedyn woźny we szkole gasiōł pożar. Było to pora lot tymu. Dostali my telefon we straży, że gore we klasie we szkole, w jednej wsi. Wiycie, jako to je z dzieckami: ône dycko coś wykōmbinujōm, abo wciepnōm świyca dymno ze starego ping-pōnga, abo kosz ze śmieciami podpolōm.
Drōga była doś daleko, jechali my możno ze pōł godziny, przijyżdżōmy na miejsce, a tam ôgyń bez ôkno wyłazi z klasy już. Wartko my rozciepali te szlauchy, ôblykli te aparaty do dychanio we kurzu i lecymy do pojstrzodka, do tyj klasy. Na siyni kolega kopnōł do czegoś i wywalōł sie jak dłōgi, ku tymu wpod pyskym do wody. Wartko stanōł i dziwo sie, że tam je rozciepnyty szlauch z wodom z tego sztyndra, co bōł we szkole w siyni, przeciwpożarowego. Idymy dalij w tyj wodzie, dochodzymy do dźwiyrzi z klasy, kaj gorało, ôtwiyrōmy dźwiyrze, a tam boazeryjo na ścianach i gipsdece gore. Po poru minutach udało nōm sie to przigasić, ale potym pora godzin rozbiyrali my ta zgorano boazeryjo ze ścianōw i plōmpali woda z pywnice, co jōm było kole metra.
A wiycie skōnd sie tam wziyna? Keryś rychtyk podpolōł kosz ze śmieciami, co stoł w rogu przi ścianie ze boazeryje. Wszyjscy uciykli i przilecioł woźny, ale zamias ôbejrzeć co sie stało, wziōn tyn szlauch ze sztyndra przeciwpożarowego, wciep na delōwka do klasy, ôdkrynciōł woda i zawar dźwiyrze, bo padoł, że tam było fest gorko. I tak to woźny pōmōg spolić klasa we szkole, wyloł ze 20 kubikōw wody do pywnice, zaloł pōł szkoły. Jedyny pożytek z tego bōł taki, że uciykły wszyski szczury, przed tōm "wielkōm wodōm". A stykło wziōnś kibel wody i poloć te śmieci, abo wyciepać tyn kosz bez ôkno. Tōż uczcie sie, jako sie używo tego sprzyntu pożarowego, gaśnicōw itp., bo gaśnica wciepnyto cołko do pywnice tyż żech już widzioł.