Bōł roz jedyn szmaterlok, co lotoł tak po łōnce, furgoł ze kwiotka na kwiotek a spijoł soki z tych kwiotkōw, aże sie trocha zmochoł, krzidła go już bolały, było połednie, słōńce przigrzywało, tōż siod se na jakimś mlyczu, a chcioł se trocha dychnyć. Szmaterlok drzimoł praje na mlyczu, a śniyło mu sie, że słyszy jakiś zwōny zwōnić. Szmaterloki do kościoła niy chodzōm, tōż niy wiedzioł, czy to zwōniōm zwōny ze kościoła, abo jaki inksze, dyć kej go już ôbudziyły, tōż ôtworzōł jedne zaspane ôko, a zejrzoł... srogi pysk ôd krowy, co szkubała trowa praje kole mlycza, co na mim siedzioł szmaterlok, a przi tymu zwōniyła lańcuchym. Szmaterlok niy rozważowoł wiela, yno sztartnōł z tego mlycza, choćby jako raketa kosmiczno, a zgrabaźniałe krzidła, cołki sztajfne ze strachu, ani sie niy poruszały, tōż cupnōł na trowa kōnsek dalij, a wrzeszczy na krowa:
-Ty krowo! Czy ty widzisz, co ty robisz? Dyć ty byś mie była zeżarła pospołu z tōm trowōm. Wiysz ty, gdo jo żech je? Jo żech je szmaterlok krōlewski!
A krowa skōńczyła spokojnie żuchłać trowa, a pado:
-Wybocz mi szmaterloczku. Wiysz, co jo szmaterlokōw niy żera, tōż kaj bych cie tam miała zeżrać. Dyć je żech już doś staro, ślepo, tōż niy dała żech na cia pozōr. Na drugi roz niy siodej na kwiotko tam, kaj jo szkubia.
-A to kaj mōm siodać? Przeca jo żech niy ma dziyndzioł, cobych na strōmie siedzioł – padoł ji szmaterlok.
- Nō ja, dyć niy gorsz sie już na mie. Kej chcesz sie zdrzimnyć, to siednij lepszy mie na rogu, a tam bydziesz mōg se trocha dychnyć. Yno trzimej sie mocno, aże niy ślecisz, jak byda trowa szkubała. A pamiyntej, coby niy siodać mi na pleca abo na ucho, aże cie niy pōmyla z jakim kopruchym, abo ślypkym, cobych cie niy śmigła ôgōnym, bo by mōg z ciebie masny flek ôstać.
Tak to ôd tego czasu szmaterlok a krowa ôstali kamratami. Jak yno bōł szmaterlok trocha zmochany, a krowa pasła sie na łōnce, to siodoł ji na rogu, a drzimoł. Krowa zwōniyła mu cichutko lańcuchym, tōż zdało mu sie, że słyszy jakoś szczyrkōwka. Niy wiym yno, czamu siodoł tyn szmaterlok krowie dycko na prawym rogu? Bōł bych sie go spytoł, ale boja sie trocha, co mie ta krowa może pobōś, jak byda szmaterloka budziōł.