Ô ptoku na trzech kōłkach

Spōmnieć Wōm tyż musza ô ptoku na trzech kōłkach.
Niy ma to nic takigo, trocha szmaty, rułka,
A tela uciechy. Dyć niy mocie pojyncio,
Co to je za rajza, a z jakōm jo tam chynciōm
Siedza pod tōm dekōm. Czy jadymy kaj blisko,
Czy możno daleko, to jo sie piyrszy wciskōm
Do Velorexa na zadek. Mama mie przezywo,
Bo sie trocha boji, tata tyż bezto krziwo
Sie na to dziwo. Ujec jeździ tak pōmału,
Tōż co by mi sie to tam na zadku stać miało?
A i ciotka tyż na mie dycko pozōr dowo,
Co bych w czasie jazdy sōm tam niy wylazowoł,
A przi tym niy wypod. Dyć sie tak łep wystyrczy
Spod deki, a dziwo. Tyn motōr tam tak wyrczy,
Że sie człowiek czuje naprowda, jak we fligrze.
Z ruły cie podtruje, a wytrzynsie na fedrze,
Choćby na karuzeli. Wczora my zaś mieli
Na gruba jechać, dyć jadymy po niedzieli,
Bo coś nawaliło. Sprzyngło bezmała klynkło,
Mi sie ô uszy ôbiło. Jo niy pamiyntōm,
Co to znaczy, dyć wiym, co to je za straszny bōl,
Jak żech musioł z mamōm w dōma zostać, wōl – niy wōl.
Zaczli motōr rozbiyrać, dyć ujec mie gōni,
Jak mie tam zejrzoł tyrać, bo zaś bych mu schrōniōł
Jaki ważne tajle. A jo sie chcioł pobawić,
Taki szrubki fajne. Chcioł żech se koło sprawić,
Szmyrōm namazać. Rynce sie trocha ściaprały,
Tōż po cichu właża. Serwet zmazoł żech cały,
Bo trza powyciyrać. Choć wcale niy puściło,
To potym pōł roku po nocach mi sie śniło,
Jak żech pasym nachytoł. Dyć wszysko wert było
Tej uciechy przi rajzie. Motōr już zaś chyto,
A bydōm go prōbować, tōż ujec sie pyto,
Czy chca na zadek siodać? Dyć, co za pytani,
Jeszcze niy zdōnżōł siednyć, a jo już je za nim.
Tak to już ôd małego tyn ptok za mnōm lotoł.
Dyć, co sie to stało? Jo sie przisłōchoł ôtok,
A tam przi chałupie wyrczy coś znajōmego.
Bez ôkno wyglōndōm: dyć jo cie znōm kolego.
Choć człowiek coroz starszy, czegoś mu brakuje,
Jak słyszy znany klank, zaroz sie młodszy czuje.
Dyć byś to ôsmolōł, że stary chłop mo bzika,
Kej roz trza prostamolu, a roz prostownika.
Velorex już niy jedno w życiu nawywijoł.
A to już je tymat na inkszo historyjo.