Ô kiszce

Fōnt kartofli, dwa harynki,
A we gorczku trocha kiszki,
I mamulka, dzieli łyżki,
Dzieckōm styrko jōm do rynki.

Doôbkoła jednej miski,
Przi tymu postnymu jodle,
Siedzōm grzeczne dziecka głodne,
A sie ôblizujōm wszyjski.

Dyć tatulka z nimi niy ma,
Tōż mamulka dowo kusku,
A piastuje ich na klinie.

W nocy ślimto we pierzinie,
Za chłopeczkym, co go rusko,
Wschodnio, ziymia ku sia wziyna.