Ô Cwergu ze Anaberga

Znocie Wy Cwerga ze Anaberga?
Niy? Jo tyż niy.
Dyć roz ôn mi sie śniōł. Bōł
Cołki modry, a mioł żōłto mycka. Dziecka
Możno go znajōm, bo ône przajōm
Roztomańtym bebokōm. Jo po cimoku,
Niż żech sie kapnōł, ôtworzōł ôczy,
To Cwerg bōł skoczōł kajś pod delōwka.
Ani pōł słōwka niy pedzioł dō mie. Ôgrōmnie
Dycko mi sie ckni za nim. Dycko na spaniu
Na niego czakōm. A mama z tatōm
Niy wiedzōm ô nim. Dyć Cwerg sie schrōniōł
Jakiś czas tymu, a sie żodnymu
Niy pokazuje. Mie to szteruje,
Tōż se tak leża, a dalij wierza,
Że musi kedyś prziś, mi sie śnić,
A wiycyj nic.
Czakōm na Cwerga ze Anaberga.