Niż wyruszysz w wielki świat

Ty, co rajzujesz po szyrokim świecie,
Żeby tam szukać piyknych strōn,
Pamiyntej: Tyś je Ślōnzok przecież,
A sam mosz swōj ojcowski dōm.

Niy styknie poznać wielki świat,
Zwiydzić Atyny, Paryż, Moskwa.
Po co daleko zaroz gnać?
Piyrsze trza świat za miedzkōm poznać.

Tam, za tōm rzyczkōm, drugo wieś.
Poznać sōmsiada, co za jedyn?
Już tela lot sam miyszkoł żeś,
A nic ô wiosce swojij niy wiysz.

Niy wiysz, kto miyszkoł sam przed Tobōm,
Jaki go spotkoł kedyś los?
Ty żeś na Ślōnsku sie wychowoł,
A czy Ty jynzyk ślōnski znosz?

Niy ważne wiela kto rajzuje,
Wiela w paszporcie wizōw mo,
Jak sie Ślōnzokym kery czuje,
To tradycyje ojcōw zno.

Tōż, niż we świat daleki ruszysz
I zrobisz autym setki mil,
To piyrsze ziymi swojij musisz
Poświyncić chocioż pora chwil.