Mucha

Tata gazeta po szychcie czyto,
A tu nad uchym yno coś bzyko –
To loce tacie kole ucha
Normalno, malutko mucha.

Tata pierōni zaroz na mucha:
-Jo cie mucho chycić musza.
Wyrwoł sie ôd stoła tata,
Loce we wszyjski strōny świata.

Sebuł strzewik, ciepnōł w ściana
I na ścianie zrobiōł plama.
Chyciōł zegłōwek i strzaskoł lampa,
Trzasnōł dźwiyrzami, urwoł klamka.

Loce tata kole stoła,
Wszyjsko trzynsie sie dokoła.
W kōńcu wyrżnōł we lodowka,
Pod jak dłōgi na delōwka.

Leży tata, stynko, syczy,
A mucha nad uchym bzyczy.
Prziszoł Jasio, godo: -Tato,
Prziniōs żech ci lyki na to.

Jak tyś sie tu tak wyżywoł,
Z dźwiyrzi klamki powyrywoł.
To jo poszoł ci do sklepu
I kupiōł na muchy lepu.

Tata z gańby je czerwiōny,
Ôn skokoł na wszyjski strōny,
Mały synek mu pokozoł,
Jak se w życiu rada dowo.