Miś a wrōna

Siedzi misio kole strōma
A na strōmie siedzi wrōna
I skrzeczy na inksze wrōny,
Tōż misia już nerwy wziōny:
-Jeszcze roz ôdezwiesz mi sie,
To zawołōm wszyjski misie,
A rozkoża chycić im cie
I im powiym: Wy jōm trzimcie,
A jo jōm ôszkubia cało.
Jak ci jeszcze bydzie mało,
To zawiōnża dziub na maszka.
Wrōna milczy do terazka.
I, jak truśki, inksze wrōny
Pokryły sie kajś na strōmy.
Misio sie ku wiyrchu dziwo,
A wrōna krzidłami kiwo.
Cōż, choć ber se niy dowiyrzo,
Wrōna niy chce być bez piyrzo,
Bo to fest bezmała boli,
Tōż na migi skrzeczeć woli.