Lampka pamiynci

Tam na gōrce, za kościołym,
Kaj szumiōm cicho strōmy,
Chodzymy dycko ze świyczkōm,
Tam ôjcōw naszych mōmy.

Tam ptoki cicho śpiywajōm
I czas pōmału płynie,
Tam idzie porzykać w skupiyniu.
Nas tyż to kedyś niy minie.

Przistōń chocioż na chwila,
Jak idziesz po kerchowie,
A widzisz krziż pochylōny
I mlycze rosnōm na grobie.

Jak widzisz grōb ôpuszczōny,
Pomyś wtedy ô sobie:
Czy ktoś świyczka zapoli,
Po latach, na Twoim grobie?

Czy na to zasłōgujesz,
Przez całe swoji życi,
Że jak Cie już niy bydzie,
To ktoś ci znicz zaświyci…