Krziżyki

Idōm Wielki Świynta. Je Palmowo Niedziela.
Trza sie palmōw chytać. Materyje je tela,
Że szło by wieś ôbdzielić. Do zadku dwa tydnie
Już mi mama pedzieli, że mōm wybrać piykne
Astki z brzōzek, kocianek, jałowca, kokocza.
Terazki piyknie yno wszysko dzisio to trza
Do kupy powiōnzać, nastrojić, a ôzdobić.
Tata nōm pōmogo, bo wiy jako to robić,
Mo w tym wielko grajfka . Trza pora prostych gałōnzek,
Potym tak prynciym z wiyrzby te astki ôbwiōnzać.
Teraz moja rola: zaniyś jōm do kościoła.
Potym bydzie zaś tydziyń we blōmwazie stoła,
Yno przedtym wszyscy jeszcze palmōm dostanōm,
Bo to ôd nas choroby bezmała ôdganio.
Zaś w Wielko Sobota palma sie nōm przidowo,
Tata mo z tym robota: głōwka urznōł, schowoł,
Reszta doł mie do rynki, do kościoła posłoł.
Farorz ôgyń poświynci, tōż to potym prosto
Ôpola, wody wezna. W Piyrsze Świynto, jutro,
W Wielkanoc po ôbiedzie brat ze siostrōm utnōm
Pora prostych patykōw, narobiōm krziżykōw.
Jo potym te krziżyki na polu powtykōm,
Pokropia ich wodōm, coby dały urodzaj.
Reszta krziżykōw w izbach wszyskich trza pochować.
Majōm chrōnić przed strachym, a ta głōwka z palmy
Trza styrczyć pod dachym. Zostawia jōm za balkym.
Zeszłoroczne resztki musza wszyski pozbiyrać,
A wrazić do pieca. Niy trza ich poniywiyrać,
Bo nōm prziniesōm pecha. Teraz już tyż leca,
Kej wszysko gotowe, na jutro musza przeca
Sikōwka szykować i parfinu namiyszać.
Wczas rano trza stować, a po śmierguście ruszać.
Pōł koszyka jajec mi sie zdo zaś nazbiyrōm.
Miesiōnc ich potym trza jeś, dyć jo rod tak tyrōm,
A dziołchy tyż przeca sōm taki rade tymu,
Jak ji kibel wylejesz: wody, czy parfinu.
I na kōniec już praje tak yno zakōńcza:
Dejcie mi zamias jajec jakigo zajōnca.