Kolybanki

Stary ber śpi kole nas.
Stary ber śpi kole nas.
Dyć, jak sie ôbudzi,
Pozeżyro ludzi.
Berze, niy zeżyrej nas!
Berze, niy zeżyrej nas!

Stary ber śpi cołki czas.
Stary ber śpi cołki czas.
Go niy ôbudzymy,
Bo sie go bojymy,
Sie ôbudzi – zeżro nas.
Sie ôbudzi – zeżro nas.

Pod miedzkōm zajōnczek śpi,
Coś fajnego mu sie śni.
Choć mo w brzuszku prōzno,
Prziśniōm mu sie możno
Z kapustōm koszyczki trzi.
Z kapustōm koszyczki trzi.

Tam we dziurze siedzi mysz.
Kocura sie boji – wiysz.
Choć kot mo pazury,
Niy siōngnie do dziury.
Przed kocurym kryj sie tyż.
Przed kocurym kryj sie tyż.

Tam na polu stoji kōń.
Przed kōniym sie dziecko chrōń,
Bo kōń mo kopytka,
Może kopnyć w łydka.
Ôd kōnia z daleka stōń.
Ôd kōnia z daleka stōń.

Po zegrodzie chodzi jyż.
Jyż mo jegły, przeca wiysz.
Kery sie niy spyto,
Yno jyża chyto,
Tego jyż pobodzie tyż.
Tego jyż pobodzie tyż.

Po zegrodzie chodzi gynś,
A z gynsiōm pilōntek piynć.
Dyć gōnsior ich brōni,
A kożdego gōni,
Kery chcioł by bez plac przynś.
Kery chcioł by bez plac przynś.

Tam po lesie chodzi wilk.
Praje se pod strōmym lyg.
Dyć niy nerwuj wilka,
Bo ôn cie za chwilka
Zymbskami zeżere w mig.
Zymbskami zeżere w mig.

Tam we norze siedzi lis.
Praje bōł wystyrczōł pysk.
Niy ciōng go za ôgōn,
Bo lisy tyż mogōm,
Bez pytanio w zadek gryź.
Bez pytanio w zadek gryź.

Tam przi budzie siedzi pies.
Tyż je groźny tyn zwiyrz fest.
Chałupy wachuje,
Wszyjskich ôbszczekuje,
Choć naszym przocielym je.
Choć naszym przocielym je.

Diyndzioł kajś na strōmie siod,
Klupoł a chroboki jod.
Na to sōm dziyndzioły,
Coby strōmōm przoły,
Tōż dziyndziołōm tyż trza przoć.
Tōż dziyndziołōm tyż trza przoć.

Tam na polu stoji chłop.
Skōnd sie tam tak wartko znod?
Możno go poznōmy,
Je cołki ze słōmy.
Straszka przeca kożdy zno.
Straszka przeca kożdy zno.

Kajś we szkutach skocze wesz,
A spod huta uciyc chce.
Trzimej błechy w hucie,
A niy dej im uciyc,
Bo pogryzōm jeszcze mie.
Bo pogryzōm jeszcze mie.

Dzisiej z rana kokot pioł.
Dzisiej z rana kokot pioł.
Jak zapieje kokot,
Rod bych dioska dopod.
Jo bych do połednia społ.
Jo bych do połednia społ.

Kura jajco zniōsła mi,
Kura jajco zniōsła mi.
Bydzie na smażōnka,
Zrobi mi jōm żōnka.
Jo se jōm z cebulkōm zjym
Jo se jōm z cebulkōm zjym.

Kajś we stowku miyszko rak,
A to było tymu tak:
Roz, skuli przipadku,
Zaczōn iś do zadku.
A światła cofanio brak.
A światła cofanio brak.

Jo we chlywku koza mōm,
Chciała wlyź na krziwy strōm,
Zawalato była,
Grucza se nabiyła.
Kōmedyjo, godōm wōm.
Kōmedyjo godōm wōm.

Tam na łōnce rośnie mlycz,
Bydymy se wiōnki plyś.
Wiōnkōw napletymy,
Dziołszkōm zaniesymy,
Coby chciały z nami być.
Coby chciały z nami być.

Na gipsdece siedzi bōnk,
Tōż Zeflik klapaczka wziōn,
Bo chce bōnka trefić,
Dyć światło go ślepi,
We krōmlojter trefiōł bōł.
We krōmlojter trefiōł bōł.

We krauzie harynek je.
Kery po harynku chce?
Dyć, dziołchy a synki
Jydzcie te harynki,
Po harynku pić sie chce.
Po harynku pić sie chce.

Tam na strōmie siedzi szpok,
A pod strōmym chłop se siod.
Coś z wiyrchu sleciało,
Chłopowi na ciało.
Co to było, kery zgod?
Co to było, kery zgod?

Po trowniku mrowiec szoł.
Cufal taki praje chcioł:
Wicynt bōł po blisku,
A siod na mrowiesku.
Poszczypany zadek mioł.
Poszczypany zadek mioł.

Kapturek roz bez las szoł,
Koszyczek dlo starki mioł,
Dyć trefiōł na wilka
A wilk już za chwilka
Adresa ôd starki mioł.
Adresa ôd starki mioł.

Kożdy z nas Kopciuszka zno,
Co z hasio wybiyro groch,
Dyć los mu zapłaciōł,
Choć strzewiczek straciōł,
Krōlewicz już baba mo.
Krōlewicz juz baba mo.

Dziywaczka do lasa szła.
Ta pieśniczka znocie, pra?
Trefiyła na fesztra,
A co było reszta,
Niy powiy pieśniczka ta.
Niy powiy pieśniczka ta.

Roz do Gogolina szła.
Karolinka znano ta,
Karlik za niōm lecioł,
Flaszka ji ôbiecoł,
Dyć sie niy wrōciyła, pra.
Dyć sie niy wrōciyła, pra.

Na szeslōngu siedzi lyń.
Padajōm mu: wejź sie żyń!
Jak se baba weźniesz,
Robota ci znejdzie.
Bydziesz mioł jōm noc a dziyń.
Bydziesz mioł jōm noc a dziyń.

Bez lato je wieki hyc,
Tōż niy chce sie robić nic.
Porobia bez zima,
Wleza pod pierzina,
A se byda grzoł ta rzić.
A se byda grzoł ta rzić.

Jo na gōrze tanka mōm,
Niōs żech go na plecach sōm,
Dyć schody zgorały,
Zaruścioł tank cały.
Chyba ôddōm go na złōm.
Chyba ôddōm go na złōm.

Na weselu kołocz je.
Nōm kołocza jeś sie chce.
Kej chcymy kołocza,
Ôżynić kogo trza.
Na weselu kołocz je.
Na weselu kołocz je.

Ziguś sztyry zymby mo.
Ziguś na grzebiyniu gro.
Dyć, jak sie zbogaci,
Reszta zymbōw straci,
To se możno gybis do.
To se możno gybis do.

Jo mōm z kołym dycko szpas,
Jada na nim jak mōm czas.
Roz jada na kole,
A roz ida kole,
Jak dostana pana zaś.
Ja dostana pana zaś.

Kajś po glajzach jedzie cug.
Tyż bych jechoł, kebych mōg.
Cōż, kej glajzōw niy mōm,
Tōż ida na przimo.
Ôstoł mi sie szłapyncug.
Ôstoł mi sie szłapyncug.

Żyli se roz baba, chłop,
Aż sie im syneczek znod.
Mało było chłopu.
Tōż jeszcze na boku
Pora inszych dziecek mo.
Pora inkszych dziecek mo.