Klupanie

Szopa bez dźwiyrzi a ôkyn,
W pojstrzodku Jōzef z Marijōm,
W starym żłōbku, we sianie,
Dzieciōntko przed zimnym kryjōm.

Stary chlywik przi familoku,
Bez wody, sztrōmu, wōnglo.
Bezdōmny leży samotny,
Ze swojim psym na szeslōngu.

Izba z kratami w ôknie,
W pojstrzodku ôśmiu chłopa,
Ale kożdy samotnie
Przeżywo swoja utropa.

Szpitalne łōżko biołe,
A na nim czyjaś matka.
Przi łōżku prōzny stołek.
A możno to je sōmsiadka?

Przi stole z familijōm,
Ôpłatek, serwet na sianie,
Prōzny talyrz – Wilijo.
Czy słyszysz te klupanie?