Kedyś a teraz

Kedyś sie chowało
Kozy we chlywikach,
Teraz trzimiōm w dōma
Szczura, a chomika.

Kedyś psy szczekały
Normalnie, przi budzie,
A teraz miyszkajōm
We blokach, jak ludzie.

Kedyś my chodziyli
Piechty do kościoła,
Teraz sōm parkingi
Pełne i przi szkołach.

Kedyś sie za balym
Lotało na dworze,
Teraz sie gro fuzbal
Myszkōm w mōnitorze.

Kedyś przed laubami
Sōmsiadki klachały,
Teraz gadu-gadu,
A czaty nastały.

Kedyś sie w niedziela
Siedziało do kupy,
Teraz niy ma czasu –
Trza iś na zakupy.

Kedyś sie zygarek
W kōmōnio dostalo,
A teraz kōmputer
Już, bezmała, mało.

Kedyś, tak godajōm,
Było sam tak piyknie,
A teraz, se myśla,
Pisanio już styknie.