Jarziny a ôwoce

Bania

Na zegrōdce rośnie bania,

podziwej sie yno na nia.

Tako wielko łeb mo. Dyć,

za niōm możesz sie aż skryć.

Tōmata

Podziwej sie yno na ta

czerwiōno z gańby tōmata.

Za co gańba je tōmaty?

Że mo taki brzuch bachraty!

Wieprzki

Wieprzki rosnōm tam na krzoku,

Koza sie im dziwo z boku,

Chocioż smak mo na ni, głodno,

niy chyci sie, bo jōm bodnōm.

Cześnie

Francik bōł dzisio na rapsie

I mo pełno cześni w kapsie.

Chocioż narwoł, teraz niy chce,

Bo to sōm gugōły jeszcze.

Radiski

Małe kulki choć czerwiōne,

wcale niy sōm słodki ône.

Poradzōm pokrziwić pyski,

taki ôstre sōm radiski

Ôgōrki

Choć majōm zielōne skōrki,

to już zdrzałe sōm ôgōrki.

Na dōł głowōm na krzach wiszōm,

potym ich w bōnclokach kiszōm.

Kartofel

Szukajōm po polu kartofelka dziecka,

Bo chcōm we fojerze upiyc z niego pieczka.

Tōż sie kartoflowi zbiyro już na płaczki,

Bo woloł by zostać zetrzyty na placki.

Groch

Wiszōm na patykach ciynżki strōnki z grocha.

Dyć już przezdrzelałe mi sie zdo sōm trocha.

Ôroz strōnczek puknōł i sie groch pokuloł,

Aż zalecioł prosto na grzōndka z cebulōm.