Jajko z gruczōm, abo lisozaur

Historyjo ta wydarziła sie fest downo tymu, jak na ziymi żyły jeszcze ôgrōmne dinozaury. Ptoki niōsły wtedy ôkrōngłe jajka, jak bale. Wtedy to wydarziła sie wielko tragedyjo: do kurnika, kaj kura miała sniyś jajko, zakrod sie wielki i groźny lisozaur. Porwoł kura, kero sie niczego niy spodziywała i zaczōn z niōm uciekać do lasa, żeby jōm ôszkubać a zeżrać. Biydoczka, niy miała żodnych szans na retōnek, ale tak fest przoła życiu, że chciała dać te życi małymu kurzōntku w jajku i uznała, że sniesie te jajko, chocioż sama była w pysku lisozaura i jeji chwile były już policzōne. Wielko była ôpowoga kury, przeca jajko mōgło sie strzaskać, jak spadnie na ziymia, ale kura niy miała wyboru, tōż czekała yno, aż bydzie trocha trowy i… prask, jajko spadło i pokulało sie po trowie. Całe szczynści, że sie niy strzaskało, ani lisozaur go niy zejrzoł, ale przi tymu, jak zleciało, jajko nabiyło se grucza z jednej strōny i przestało być okrōngłe, jak bal. Urodziyło sie z niego kurzōntko, co miało cały życi grucza na głōwce i to ône ôpowiedziało inkszym ta historyjo. Jak sie ô tym dowiedziały inksze kury, a za nimi wszyski ptoki, to zwołały wielki zebrani, coby porzykać za ta bohatersko kura. Uznały tyż, że ôd tego czasu bydōm niyś jajka z gruczōm z jednej strōny.