Jadymy

Świat wartko sie krynci.
Pod wiela sōm chynci,
Jadymy!

Pod wiela nōm chce sie.
Co jutro prziniesie?
Niy wiymy!

Choć robisz za trzech,
Jo ôstrzegoł żech
Cie chłopie:

Niy starej sie, życi
Same ci do rzici
Nakopie.

Tōż ruszej przed siebie,
ô wodzie a chlebie.
Do przodu!

Trza przeżyć przigoda.
Przespać życi szkoda,
Za młodu.

Na głowie włos siwy,
I trochaś już krziwy?
Dyć szalej.

W auto wsodź rodzinka,
Kup se piwka krzinka
I wcale

Niy chodź do aptyki,
Ôdstow wszyjski lyko,
Dochtora.

Posłōchać chciyj mie,
Że to jeszcze niy
Ta pora!

Na starość ô kryczce,
Za piecym na ryczce
Spōminosz,

Ô tych downych latach,
Ale czasu na to
Już niy mosz.

Pod wiela dosz rady,
Trzimej sie zasady:
Jadymy!