Jadymy maluchym na wczasy

Jadymy maluchym na wczasy,
Do DDRu, na Zachōd.
Klamorōw mōmy piynć taszy,
Na bagażniku, na dachu.

Ze zadku dziecka siedzōm,
Baba kole mie, na zicu.
Dyć niech sōmsiady wiedzōm,
Że nas na wczasy styko.

Baba mo nowo kecka,
Jo brele ciymne, do szpasu.
Niech sie radujōm dziecka,
Że mogōm jechać na wczasy.

Sto marek we potmanyju,
Niy trzeba nōm przeca wiyncyj,
Bo mōmy termos tyju,
A tasza biksōw z miynsym.

Kupiymy se szekulady,
Jak styknie, to po lodzie,
Niech wiedzōm tyż sōmsiady,
Że nōm sie fest powodzi.

A jak nazod wrōcymy
Ze wczasōw, za dwa tydnie,
Szporować zaś bydymy,
A żyć cały rok biydnie.

Za rok zaś przidzie lato,
To biksōw se kupiymy,
Na Wyngry, nad Balatōn,
Maluchym pojadymy.

Jadymy se na wczasy,
Maluchym, z całōm rodzinōm.
Klamorōw mōmy piynć taszy,
A dwa kanistry z bynziōm.