Godziny po ślōnsku

Po ślōnsku pytōmy sie : wiela je godzin, a niy kero je godzina!

Je: dwie, sztyry, dziesiynć, a niy drugo, sztworto, dziesiōnto.

Po ślōnsku je 12 godzin, a niy 24 – je 12 godzin do połednia i 12 godzin po połedniu.

Po ślōnsku je „sztwierć godziny“, a niy kwadrans.

Przikładowe godziny po ślōnsku:

0:15 – sztwierć na jedna w nocy

1:00 – jedna w nocy

1:30 – pōł drugij w nocy

1:40 – za dwadziyścia dwie w nocy, abo pōł drugij a dziesiynć minut

2:05 – dwie a piynć minut w nocy

4:20 – za dziesiynć (minut) pōł piōntyj rano

4:57 – za 3 (minuty) piynć, abo dochodzi piynć (mynij dokładnie)

7:47 – przeszło trzi sztwierci na ôsmo, abo 2 minuty po trzi sztwierci na ôsmo.

9:14 – za minuta sztwierć na dziesiōnto, abo dochodzi sztwierć na dziesiōnto.

11:58 – dochodzi połednie, abo za dwie minuty połednie

13:00 – jedna po połedniu

14:02 – dwie a dwie minuty

16:31 – pōł piōntyj a minuta, abo przeszło pōł piōntyj

18:26 – dochodzi pōł siōdmyj, abo za sztyry minuty pōł siōdmyj.

21:00 – dziewiynć wieczōr. Jeżeli pora dnia wyniko ze godki, to niy trza godać „rano“, abo „po połedniu“, czy „we wieczōr“.

Jak powiymy: „Już je dziewiynć, trza iś spać“, tōż niy trza godać „dziewiynć we wieczōr“, bo żodyn niy chodzi spać ô dziewiōntyj rano.