Ślōnsk dzisiej

Godeczko Ty Nasza

31 stycznia, 2012 /

Godeczko Ty Nasza,
Nasz chlebiczku z miodym,
Chciyj Ty zaszmakować
Naszym dzieckōm młodym,
Co by Cie kosztować
Chcieli na kożdy dziyń,
Co by Ślōnsko Mowa
Niy była sam w biydzie.

Wyrostosz na ziymi,
Krwiōm, potym, skropiōnej,
Ôbrozkami tymi
Do siebie przekōnej.
Niech poczuje kożdy
Ślōnskość w swojij duszy,
Niech dowiy sie prowdy,
Sumiyni go ruszy.

Godeczko Ty Nasza,
W Ciebie drzymie siyła.
Tyś w najgorszych czasach
Dycko z nami była.
Kwitnij nōm sam Godko,
Jak kwiotka na łōnce,
A ôgrzywej mocno,
Jak majowe słōńce.