Fojerman robi za rechtora

Ludzie, wiycie ku czymu to prziszło: Fojermana wziyni za rechtora, a kozali mu uczyć ludzi, jako sie to po tym ślōnsku pisze. Wiycie, co to je za ciynżko robota, te rechtorowani. Jo żech se myśloł, co bydzie chwila posiedzieć, napić sie kafyju. Ale kaj. Wiycie jaki te szkolorze sōm teraz frechowne. Ôni by chcieli bele co wiedzieć, yno sie pytajōm, a ty mosz na wszyjsko ôdpowiadać. A sprōbuj ty sie ich co spytać. Czyś ty je gupi. Przeca to ty im mosz godać, a niy ôni. To je normalnie ōnmyjglich. A teraz mi jeszcze padali, co za miesiōnc chcōm jeszcze jedna tako lekcyjo robić. Dyć jo se to musza rozwożyć. Czy wiym, kery zaś tam przidzie, a ô co sie mie bydzie pytoł? Czy mie to trza na stare lata sie tak nerwować? Powiydzcie sami.

Dyć z drugij strōny, człowiek z gańby musi tyż co poczytać, coby niy wylyź na jakigo sorōnia, tōż możno sie werci roz za czas za tego rechtora porobić.

Foto. Sebastian Rosiak DURŚ